Jaman Sangsaya Pikun
Tirta Nursari
Donya sangsaya pikun
Nom-noman kelangan pandom
Sajrone wana pindha Cakil
Pethenthang-pethentheng
Gawa curiga ligan
Sadawane marga tan beda klithih
Geber motor knalpot dibrom
Sajak sekti tanpa tanding
Tan eling sadhuwure langit ana langit
Para mudha mesthine sinau
Gulawenthah dhiri supaya dadi generasi emas
Ora mung dadi generasi stroberi
Kang ayu utawa gantheng
nanging gampang bosok
dadi mangsane uler sartane singgat
Iki jaman sangsaya gemblung
Apa gurit klawu pantes sinambung?
Bergas Lor, 3O Desember 2024
Nalika Kekayon Kinemulan Pedhut
Tirta Nursari
Pedhut tumiyung
Pasuryan aclum
Netra surem
Luh angembun pepajar
Bantala nandhang dhuhkita
Blencong kelangan sunar abyore
Polahe kekayon sangsaya mandheg mangu
Ngadeg miring, malang sungsang, ngetan ngulon
Urip tanpa paugeran
Duh, Gusti, amba nyuwun pitedah
Punapa ingkang sampun dumados wonten ing praja punika?
Tancep kayon
Bergas, 2 Oktober 2024
